Instinkti letrar në këtë libër ka ndjerë nevojën letrare e shpirtërore për t’i zbuluar lexuesit dimensione të reja të shpirtit ende të pazbuluar njerëzor, të komplekseve gjith monë të panjohura dhe të papërkufizuara të raporteve dashurore dhe ndërnjerëzore, si dhe të humbëtirave tokësore dhe qiellore të lidhjes së shpirtit me trupin. Shaban Murati Ky libër ka kompozicion krejt origjinal, me kapituj të shkurtër, të emëruar me emrat e personazheve që i njeh “dhëmbë e dhëmballë” dhe që i leviz si brenda një kalei doskopi, duke krijuar mozaikë të ndryshëm njerëzorë. Violeta Kongo

Kaloi një kohë dhe libri “Zhurma e erërave të dikurshme” nuk po dilte nëpër librari. Nuk vonoi edhe shumë dhe mua më thirrën në Komitetin Qendror, bashkë me redaktorin e librit dhe me shefin e redaksisë së tregimit të shtëpisë botuese “Naim Frashëri”. Në atë takim ishim përgjegjësi i shtypit, drejtori i drejtorisë së propagandës dhe një tjetër. Në takim u diskutua, me libër përpara, se çfarë duhej bërë me atë botim: a mund të lejohej të qarkullonte nëpër librari apo të ndalohej. Vërejtja kryesore ishte se nxihej realiteti i jetës së atëhershme socialiste dhe se deheroizohej Lufta Antifashiste Nacional – Çlirimtare: personazhet e partizanëve pasqyroheshin të zymtë dhe me shumë kontradikta mes tyre, pushkatoheshin kur bënin gabime dhe shkelnin rregullat e luftës. Pas këtyre vërejtjeve, një ndër pjesëmarrësit, që nuk më kujtohet se cili ishte, tha se libri duhej ndaluar, një tjetër shtoi se duheshin hequr disa tregime dhe të botohej me një kopertinë tjetër jo aq të zymtë. I treti propozoi të botohej siç ishte dhe pastaj të kritikohej, duke u përcjellë me disa artikuj.