Intervista e shkrimtarit dhe kritikut të njohur francez , Eric Faye , me Ismail Kadarenë , që botohet në këtë libër , është unikale në llojin e vet , ngaqë është kryer në tri kohë , krejtësisht të ndryshme . Ajo që bie në sy në të trija bisedat është koherenca e mendimit dhe stilit të të shprehurit , gjë që jep përshtypjen sikur është e njejta kohë , jashtë ndryshimeve dhe trysnive politike .

Historia dhe miti i Maria Callas-it: një ikonë e epokës sonë, e përshkruar dhe e përjetësuar në një novelë grafike, fryt i një pune kërkimore shumë të kujdesshme. Nëpërmjet figurave dhe fjalëve të autores Vanna Vinci, Callas-i bëhet një personazh i tragjedisë greke (skema e së cilës është rihartuar në këtë libër, madje duke vënë në përdorim edhe korin) dhe, në të njëjtën kohë, edhe një super yll. Një vepër që pasionon dhe mallëngjen, nga e cila del në pah një reflektim mbi fuqinë e artit si një çlirim personal dhe mbi talentin, njëkohësisht si bekim dhe dënim.Vanna Vinci, e cila u shfaq në botën e librave vizatimorë në fillimin e viteve nëntëdhjetë, u shqua si një autore nga më të mëdhatë, e ndjekur dhe e vlerësuar jo vetëm nga publiku italian. Veprat e saj, në fakt, janë botuar në vende të ndryshme, ndër të cilat në Francë, Gjermani dhe Angli. E dalluar nga një stil shumë vetjak, i cili i përshtatet çdo lloj rrëfimi, Vinci është edhe krijuesja e rubrikës humoristike Fëmija filozofike (që ka si protagoniste alter egon e saj), si edhe ilustruese librash për të rinj. Jeton mes Bolonjës dhe Milanos.

“Varfanjaku i Zotit” është libri i tetë në radhë i kolanës ANIMA, i shtëpisë botuese “Dukagjini”. Ky roman është shkruar nga Nikos Kazanxaqis, i cili konsiderohet gjiganti i letërsisë moderne greke. I njohur dhe i vlerësuar në gjithë botën, i çmuar dhe i adhuruar nga shumë shkrimtarë të tjerë, Kazanxaqis u nominua nëntë herë për çmimin Nobel. “Varfanjaku i Zotit” është historia e Françeskut të Asizit, shenjtorit të pashoq, që ndryshoi rrugën e të menduarit dhe të afruarit me zotin. Një rrëfim prekës, i thellë, i jashtëzakonshëm që, përmes shembullit të jetës së Françeskut, na fton të kthehemi kah shpirtërorja dhe kah humania. Një libër mbi përkohshmërinë e mishit dhe përjetësinë e shpirtit, por mbi të gjitha për përjetësinë e letërsisë, të së bukurës. Romani u përkthye nga Romeo Çollaku.